02.04.08 "Հայջրմուղկոյուղի" ՓԲԸ գլխավոր տնօրեն Պատրիկ Լորենը, USAID Հայաստանյան գրասենյակի աշխատակիցների հետ համատեղ շինարարական աշխատանքների որակի հսկողության նպատակով այցելեցին Արարատի մարզ: Այստեղ, ընկերությունը Միջազգային զարգացման Գործակալության ֆինանսավորմամբ իրականացնում է "Արտաշատ քաղաքի և հարակից 27 գյուղերի ջրամատակարարման վերականգման ծրագիրը":

Արտաշատ քաղաքի և մոտակա Ոստան և Շահումյան գյուղերի ջրամատակարարման բարելավման նպատակով, ծրագրով նախատեսված է Քաղցրաշեն գյուղի մոտ գտնվող օրվա կարգավորման ջրամբարի տարածքում կառուցել ևս մեկ ջրավազան 4000խմ ծավալով, վերանորոգել գոյություն ունեցող 2x2000խմ ծավալով ջրամբարները, վերակառուցել կառավարման հանգույցները, կառուցել ջրաչափական հանգույց, վերականգնել տարածքի սանիտարական գոտին:

Արտաշատի ջրամատակարարման բարելավման և ջրի կորուստները վերացնելու նպատակով նախատեսված է քաղաքի ջրամատակարարման ցանցը դարձնել օղակային, կառուցելով օղակների բացակայող հատվածները և Արտաշատ-Քաղցրաշեն հատվածում վերակառուցել շուրջ 6կմ երկարությամբ ջրատարը Փ400մմ խողովակներով:

Ջրատարը հատում է երկաթգիծը, որի հտ հատումը իրականացվելու է սելավատարի միջով: Շինարարական կազմակերպության ղեկավարի հետ քննարկվեցին այդ հատվածում հնարավոր տեխնիկական բարդություները: Մոտ 70մ երկաթգծի կամուրջի տակ որտեղով նախատեսված է անցկացնել ջրագիծը առկա են ստորգետնյա ագրեսիվ ջրեր:

Վերին Դվին տանող ճանապարհի եղրով անցնող 3.2կմ ջրագծի 1.7կմ հատվածի անցկացման աշխատանքները մոտենում են ավարտին: Շինարարական կազմակերպության ղեկավարի հետ քննարկվեցին փորձարկման և աշխատանքների ավարտի վերաբերյալ հարցերը: Վերին Դվին համայնքի ղեկավարի հետ քննարկվեցին գյուղի ջրամատակարարման և ասֆալտի վերականգմանը վերաբերվող խնդիրները: